استخدام الـ AI لكتابة سكريبتات إعلانية مدمرة
عشان نكون صُرحا، الـ ChatGPT مش "سحر" هيكتبلك إعلان ياخد جايزة لوحدُه. لو دخلت قولتله "اكتبلي إعلان لشركة ملابس"، هيطلعلك سكريبت آلي، ممل، ومكتوب بلغة عربية فصحى غريبة زي "يا إلهي، هل تبحث عن أناقة لا مثيل لها؟". الـ AI هو مساعد ذكي جداً، بس بيحتاج منك (Prompt Engineering) توجيه دقيق زي المخرج ما بيوجه الممثل.
1. تغذية الـ AI (The Context)
الـ AI ميعرفش السوق المصري، ولا يعرف المنتج بتاعك. قبل ما تطلب منه سكريبت، لازم تديله السياق كامل.
مثال للـ Prompt الصح:
"أنا ميديا باير في مصر. ببيع (حذاء طبي مريح جداً). التارجت بتاعي هما (الرجال فوق سن 40 اللي بيعانوا من آلام الظهر وبيمشوا كتير في شغلهم). السعر 600 جنيه. عايزك تلعب دور (Copywriter محترف)، وتكتبلي فيديو إعلاني مدته 45 ثانية."
2. تحديد الهيكل (The Framework)
لو سبت الـ AI يكتب براحته، هيعمل مقدمة طويلة جداً. لازم تجبره يمشي على هيكل الـ Direct Response.
"اكتب السكريبت باستخدام هيكل (AIDA).
1. ابدأ بـ Hook قوي جداً بيضرب على وجع الظهر في أول 3 ثواني.
2. وضح إن الجزمة دي فيها تقنية ميموري فوم طبية.
3. اكتب الـ Call to Action بصيغة الاستعجال.
مهم جداً: اكتب السكريبت بالعامية المصرية الدارجة، وبلاش لغة عربية فصحى نهائياً."
3. توليد الزوايا (Angle Generation)
أعظم استخدام للـ AI مش إنه يكتب السكريبت نفسه، بل إنه "يعصر دماغه" ويجيبلك أفكار إنت مكنتش متخيلها.
اطلب منه الآتي: "اديني 5 زوايا تسويقية (Marketing Angles) مختلفة تماماً عشان أبيع بيهم الحذاء الطبي ده".
- الـ AI هيقولك:
- الزاوية 1 (الخوف): "إزاي الجزمة الغلط ممكن تجيبلك انزلاق غضروفي".
- الزاوية 2 (الهدية): "أحسن هدية تجيبها لوالدك عشان يخفف ألم رجله في الصلاة".
- الزاوية 3 (الإنتاجية): "إزاي الجزمة المريحة هتخليك تركز في شغلك بدل ما إنت مركز مع وجع كعبك".
كل زاوية من دول هتاخدها وتخلي الـ AI يكتبلك عليها سكريبت، وبكده بقى معاك 3 فيديوهات أقوياء جداً للـ Creative Testing في أقل من 10 دقايق!